კოალიციაში გაერთიანდა 28 ორგანიზაცია, მათ შორის არასამთავრობო ორგანიზაციები, ბიზნეს და პროფესიული ასოციაციები და მედია ჯგუფები. ახლად შექმნილი კოალიცია მიზნად ისახავს სამოქალაქო საზოგადოების ჩართულობისა და მთავრობის პასუხისმგებლობის გაზრდის ხელის შეწყობას დამოუკიდებელ და გამჭვირვალე მართლმსაჯულებისთვის. კოალიციის შექმნას მიესალმა ბ-ნი ჯონატან კონლი, USAID/საქართველოს მისიის დირექტორი. ღონისძიებას ესწრებოდა ქ-ნი რობერტა მაჰონი, შეერთებული შტატების საერთაშორისო განვითარების სააგენტოს (USAID) ადმინისტრატორის მოადგილე.

პარტნიორობის დაწყების აღსანიშნავად კოალიციის წევრებმა ხელი მოაწერეს  ურთიერთშეთანხმების მემორანდუმს. შეხვედრაზე ითქვა, რომ კოალიციის  წევრობის სურვილი უკვე გამოთქვეს სხვა ორგანიზაციებმაც. კოალიცია დაფუძნდა USAID-ის მიერ დაფინანსებული „სამოქალაქო ინიციატივა დამოუკიდებელი მართლმსაჯულებისთვის” (CIIJ) პროექტის ფარგლებში, რომელიც ხორციელდება ევრაზიის თანამშრომლობის ფონდის მიერ, EWMI-ის შუამავლობით. პროექტის მიზანია პროფესიული იურიდიული ასოციაციების, ადამიანის უფლებების სფეროში მომუშავე არასამთავრობო ორგანიზაციების, ბიზნეს და პროფესიული ასოციაციებისა და მედიის ინსტიტუციური შესაძლებლობების გაძლიერება, შესაბამისი სასამართლო პრაქტიკის მონიტორინგი და დამოუკიდებელი სასამართლოს ადვოკატირება.